Ata'nın 9. Ordu Müfettişliğine
Bâb-ı Âlî
Dâhiliye Nezâreti
Şifre Kalemi
Mahreci: Samsun
Fî 19 Mayıs sene [13]35
Şifre Telgrafnâme
Dâhil-i livâdaki eşkıyâ çetelerinin mikdâr ve milliyetleri ile rü’esâ isimlerini ve silâhlarının nev‘ini ve maksad-ı şekâvetlerini hâvî ma‘lûmâtın Üçüncü Kolordu kumandanı vâsıtasıyla kendisine verilmek üzere ihzârını 12 Mayıs sene [13]35 şifre ile Bâb-ı Âlî'den iş‘âr ve teblîğ eden Dokuzuncu Ordu Kıta‘âtı Müfettişi Mirlivâ Mustafa Kemal Paşa bugün Samsun'a muvâsalât ederek hakkında lâzım gelen ihtirâmât ve merâsim-i hoş-âmedî îfâ edilmiş vazîfe-i mevdû‘asına mübâşeret eylediği tezkîre-i mahsûsa ile müşârun-ileyh tarafından bildirilmişdir.
Müşârun-ileyhin me’mûriyeti hakkında nezâret-i celîlelerinden bir gûnâ teblîgât vâki‘ olmamasına mebnî cihet-i mülkiyeye müte‘allik vazîfe ve salâhiyeti derecesi iş‘âr buyurulmasını istirhâm ederim.
Fî 19 Mayıs sene [13]35
Mutasarrıf
Edhem
Mustafa Kemal Paşa'nın Samsun'a varışını bildiren telgraf.
Devlet-i Osmaniye
Telgraf ve Posta ve Telefon Nezâreti
Mahreci: Samsun
Numara: 1029
Târîh: 20/5/[13]35
Numara: 2
Beyoğlu Mutasarrıflık Dâiresi karşısında
Sempatyan Apartmanı'nda Dâhiliye Nâzırı
Ali Kemal Bey'[e]
Dâhiliye Nezâreti 'ne
Bugün öğleden evvel saat sekizde Samsun'a muvâsalat ve vazîfe-i mevdû‘a-i âcizîye mübâşeret olunduğunu arzeylerim.
Fî 19 Mayıs sene [13]35
Dokuzuncu Ordu Kıta‘âtı Müfettişi
Fahrî Yâverân-ı Hazret-i Şehriyârî'den Mirlivâ
Mustafa Kemal